Ретинобластом е редок тумор кој се јавува на ретината во раната детска возраст.

Причини, инциденца и ризик фактори

Ретинобластомот е предизвикан поради генетска мутација на клетките, поради што се јавува неконтролиран канцероген раст.

Во поголем број на случаи, мутацијата се појавува кај деца во чии семејства никогаш претходно немало појава на очен канцер. Но, во останатите случаи мутацијата е присутна кај повеќе членови од семејството. Доколку мутацијата погодува едно семејство, шансите за појава на туморот се 50%.

Канцерот ги напаѓа децата под 6 годишна возраст. Најчесто е дијагностициран во првата или втората година од животот.

Симптоми

Можат да бидат зафатени едното или двете очи.

Зеницата станува бела или има бели точки. Белиот отсјај од окото најчесто и најдобро се забележува на фотографии кои се направени со блиц. Наместо типично ,,црвено око” на фотографијата се добива ,,бело око” .

Останатите симптоми вклучуваат:

• Кривење на очите
• Дупли слики
• Болка и црвенило во окото
• Слаб вид
• Различна боја на ирисот на двете очи

Доколку туморот се рашири надвор од окото се појавува и коскена болка.

Знаци и тестови

Се прават следниве испитувања:

• Преглед во широка зеница
• ST скен или MR на главата
• Ултразвук на окото
• Коскена биопсија и испитување на цереброспиналната течност кај поагресивните облици на туморот

Третман

Третманот зависи од големината и локализацијата на туморот.

• Малите тумори можат да бидат третирани со ласер хирургија или криотерапија
• Зрачењето се користи за локални и за поголеми тумори
• Хемотерапијата се користи доколку туморот се шири позади окото

Во случаи кога туморот не реагира на третманите, потребно е окото да биде хируршки отстрането (енуклеација). Во одредени случаи тоа може да биде и првичниот третман.

Прогноза

Доколку туморот не се шири позади окото, скоро сите пациенти би можеле да се третираат. Лекувањето бара агресивен пристап па дури и како што споменав, отстранување на окото.

Доколку прогресијата на туморот е позади очното јаболко веројатноста за лекување е мала и зависи од начинот на туморскиот раст и развој.

Компликации

• Слепило
• Туморот може да се шири кон очниот нерв, мозокот, белите дробови или коските

Препорака

Направете дополнителни испитувања кај вашиот доктор доколку очите на вашето дете изгледаат несекојдневно или истите отстапуваат на вашите фотографии.

Превенција

Генетските испитувања овозможуваат да се пронајде ризикот за појавата на оваа заболување. Тоа е од особена важност кога еден член од семејството ја имал оваа болест или доколку ретинобластомот се појавил на двете очи.